Во македонскиот Културно-информативен центар во Загреб, по повод 22 април – Денот на планетата Земја, беше одржан уникатен мултимедијален културен настан кој ја обедини науката, уметноста и музиката. Настанот го отвори директорката на МКИЦ, Мими Ѓоргоска Илиевска, а публиката имаше можност да ја посети изложбата „Македонскиот рубин – моќниот зрак на нашето срце“, реализирана во соработка со здружението „Откритие“.
Изложбата, чиј концепт го потпишуваат инженерите Деан Шкартов и Илија Петковски, претстави вредни примероци на минерали, кристали, фосили и македонски рубини, меѓу кои и алги строматолити стари 1,8 милијарди години – првите форми на живот на Земјата. Преку својата богата колекција, Откритие ја афирмира научната и културната вредност на македонското минералошко наследство.
Настанот кулминираше со етно-концертот на групата „Баклава“, која годинава го одбележува 20-годишниот јубилеј. Под водство на Елена Христова, групата приреди емоционален и космополитски музички настап со традиционални и авторски композиции во духот на world music.
Меѓу присутните беа претставници на дипломатскиот кор, МПЦ, локалната власт, културни институции и бројни Македонци кои живеат, работат и студираат во Загреб, што му даде на настанот вистинска културна и духовна тежина.
Текстот го подготвија Илија Петковски и Искра Бекриќ
Фотографии преземени од социјалните мрежи на Македонскиот Културно Информативен Центар во Загреб : instagram.com/kic.rsm.zg
